Herschaftszeide, ma mähnt, awei were se ganz verriggt. Do läse eisch in
de Zeirung, dat Housfra awei "Haushaltsführende" häße soll. Jo, un en
Bauer is dann en "Landwertschaftlischa Betriebsführende". Wer hot sisch
däne Färz bloß ousgedaacht? De "Deutsche Hausfrauenbund (DHB)"! Die hon
gemähnt, se missde sisch awei "DHB - Netzwerk Haushalt, Berufsverband
der Haushaltsführenden" nenne. Jo, Hauptsach Netzwerk! Dat is jo mei
Lieblingswort (no dem Hoppehaaf). Un "Sünnergie" un "Nachhaldischkät"
orre wie dat hääßt. Eisch mähne als, et is en Sünn un en Schand, wat do
so Sesselfurzer als simmeleere duhn. Se däte räschda mo ebbes schaffe.
Awa wemma de ganze liewe lange Daach im Bürro uffem Hinnere hucke duht
un nit an die frisch Luft kimmt, dann duht de Kopp hordisch en Hoppehaaf
Färz produzeere. Genau wie mitte Studende. Dat därf ma ach nimme sahn.
Dat häßt awei "Studierende". Warum ähnfach, wemma"t ach komplzeert kann
hon?
Un wie duhn se de ganze Färz begründe? Dat Immetsch vun em Framensch,
dat wo dähäm schaffe duht, muss bessa were, sahn se. Eisch sahn ouch:
Dat is de greeßde Bleedsinn, wo eisch geheert hon. Die mähne werklisch,
wemma däm Kind en annere Name git, werd"s bessa - se Läbdaach nit! Se
däte räschda die Mannskerle verpflischde, mol vier Wuche lang dat se
mache, wat so en Housfra alles schaffe duht: Morjens die Kinn wecke,
Frühstück mache, se an de Bus bränge, dann die Betta gemach, ufgeroumt,
Spühlmaschin leer geroumt, en Maschin Wäsch ufgestallt, noch en Kaffi
gemach un en halleb Stunn in "Wer kennt wen" gesörft orre Zeriung geläs,
inkaafe gang, un dann is schun Zeit fer Middach. Esse koche, abroume, de
Kinn bei de Uffgabe helfe, se in die Mussigstunn fahre, im Garde mengte,
die Oma besuche - un dann kimmt jo hordisch de Göttergatte häm. Ohmends
geht ma noch uf de Elternohmend in de Kinnagarde. Un dann will de Alt
noch en Kneppsche mache.
Wat eisch awei ufgezielt hon, is jo bloß en kläne Dähl vun däm, wat so
en Housfra alles schaffe duht. Eisch garandeere ouch: Die meersde Kärle
däte schon no zwo Wuche bettele. Loss meisch bitte bitte wiere uf die
Awed. Im Färnseh git"s jo so"n Serie: "Frauentausch". Se dähte mo bessa
Kerl un Framensch tousche losse, dann wär hordisch klar: En Housfra
broucht so mansches, bloß kä noue Name.
Ihmäl an de Flabbes:
Thomas.Torkler@Rhein-Zeitung.net
Rhein-Hunsrück-Zeitung vom Freitag, 20. November 2009, Seite 15. |